نێتفلێکس لە سێ مانگی کۆتایی پاردا نزیکەی نۆ ملیار دۆلار داهاتی هەبووە

2024-02-22

بەهای پشکەکانی کۆمپانیای نێتفلێکس بەرزبووەوە دوای ئەوەی کۆمپانیاکە راپۆرتی چارەکی چوارەمی بڵاوکردەوە.

 

بەپێی راپۆرتی دارایی کۆمپانیای نێتفلێکس لە چارەکی چوارەمی ساڵی رابردوودا، 13 ملیۆن و 100 هەزار هاوبەشی نوێ بە هاوبەشەکانی کۆمپانیاکە زیادبووە و کۆی گشتی هاوبەشەکانی بەرزبووەتەوە بۆ 260 ملیۆن و 300 هەزار هاوبەش.

 

ژمارەی هاوبەشەکانی نێتفلێکس ئێستا تەنانەت زیاتر بەرزبووەتەوە بۆ 260 ملیۆن و 800 هەزار هاوبەش، بە واتایەکی دیکە لە مانگی 1ی ئەم ساڵیشدا 500 هەزار هاوبەشی دیکەی زیادکردووە.

 

کۆمپانیای نێتفلێکس کە تایبەتە بە پەخشی ڤیدیۆیی ئۆنلاین، لە چارەکی چوارەمدا هەشت ملیار و 830 ملیۆن دۆلار داهاتی هەبووە و پوختەی قازانجی 937 ملیۆن و 800 هەزار دۆلار بووە.

 

بەوپێیەش کۆمپانیاکە توانیویەتی ئامانجی خۆی لە 2023دا بپێکێت و رایگەیاندووە، لە 2024دا هەوڵدەدات رێژەی قازانجی پوختەی بەراورد بە داهاتەکانی بەرزبکاتەوە بۆ 24٪.

 

بەرزبوونەوەی داهاتی کۆمپانیای نێتفلێکس بەهۆی زیادبوونی داهاتی ریکلام و رێگریکردن لە هاوبەشیکردنی پاسوۆردی نێتفلێکس بووە لەلایەن هاوبەشەکانی. نێتفلێکس لە 2023 دا هەڵمەتێکی گەورەی ئەنجامدا بۆ رێگریکردن لەوەی کە بەکارهێنەران بتوانن پاسوۆردی نێتفلێکس هاوبەشی پێ بکەن لەگەڵ کەسانی دیکەدا.

 

لە دوای بڵاوکردنەوەی راپۆرتی دارایی، بەهای پشکەکانی نێتفلێکس بەرێژەی 1.33٪ بەرزبووەوە. هەر پشکێکی نێتفلێکس ئێستا بە 492 دۆلار مامەڵەی پێوەدەکرێت.